Róðursfólkaskeið í Hósvík aftur fullteknað
Leygardagin skipaði Róðrarsamband Føroya fyri fyrsta av tveimum róðursfólkaskeiðum í 2026, hesuferð í Hósvík. Hetta er triðja árið, at RSF skipar fyri slíkum skeiði, og eins og undanfarin ár var skeiðið í Hósvík fullteknað.
Luttøkan var ein góð blanding av royndum og óroyndum róðursfólkum, sum øll høvdu áhuga í at menna sínar førleikar. Á skeiðinum fingu luttakararnir bæði teoretiska og praktiska undirvísing, við denti á tær mongu uppgávurnar, ið hoyra til leiklutin sum róðursfólk.
Dagurin byrjaði í bygdarhúsinum í Hósvík við teoretiskari undirvísing. Jógvan Joensen, dómari, hevði framløgu um ávaringarskipanina og leiklutin hjá dómaranum á stevnu. Síðani undirvístu tvey av royndastu róðursfólkum okkara, Marius Albert Petersen og Sarita Kristina Hansen, í evninum “at vera róðursfólk”. Her varð dentur lagdur á millum annað at lesa veður og vind, fáa manningar at lurta/akta, yvirlit á stevnum og at stýra rætt.
Áðrenn farið varð út á fjørðin til praktiska partin, bjóðaði Hósvíkar Róðrarfelag luttakarunum ein bita at eta, sum var við til at skapa ein góðan og hugnaligan karm um dagin.
Róðrarsamband Føroya vil takka Hósvíkar Róðrarfelag fyri at hýsa skeiðnum og skapa góðar umstøður fyri einum væleydnaðum degi.
Seinri í apríl verur róðursfólkaskeið í neystinum hjá Vágs Kappróðrarfelag, her eru enn nøkur pláss eftir.
Myndir frá degnum síggjast á okkara facebook vanga.
Tiltakið var stuðlað av:
Sunda Kommuna
Føroya Skipara- og Navigatørfelag
