RSFTiðindi
Tað eru 40 ár síðani, at Róðrarsamband Føroya varð sett á stovn.
 
Á ársfundi í 1979 legði Róðrardeildin undir Ítróttarsambandi Føroya fram soljóðandi uppskot: Ársfundurin gevur deildini heimild til at fyrireika sersamband fyri róður, harímillum kapping um búmerki, sum eisini kann nýtast sum heiðursmerki.
 
Tann 18. apríl 1980 varð boðað til fund til stovnan av Róðrarsambandi Føroya. Neyðugt varð at hava eykaaðalfund 14. maj 1980, har stovnan av Róðrarsambandi Føroya varð endaliga góðkend.
 
Í fyrstu starvsnevndina vóru valdir:
Formaður: Ísak Mikladal, Klaksvík
Næstformaður: Bjarni Berg, Skála
Skrivari: Dánjal Joensen, Kvívík
Eykamaður: Piddi Lamhauge, Runavík
 
Í 1980 vóru 60 bátsmanningar meldaðar til FM-róðrar, ið vóru á Norðoyastevnu, Eystanstevnu í Runavík, Jóansøku í Vági, Vestanstevna í Vestmanna og Ólavsøku
Luttøkugjaldið fyri hvørja bátsmanning var ásett til kr. 100,00.
 
RSF hevði eitt hall í roknskapinum á kr. 4.511,59 fyri árið 1980.
 
Í 1981 varð avgjørt at útskriva eina kapping um búmerki til RSF. Inn komu 56 uppskot, har uppskotið, ið Jákup Hjaltalin, Tórshavn hevði teknað, varð valt. Hann fekk kr. 2.000 í virðisløn.
 
Tann 12. februar 1981 heitti Havnar Róðrarfelag á RSF um at skipa fyri onkrum tiltaki til at skaffa pening til trongu fíggjarstøðuna hjá sambandinum. Tann 16. maj 1981 er kappróður á Havnar vág og dansur í Havnar Klubba. Tiltakið gav kr. 8.856,55, sum vóru settar í grunn, at keypa amboð fyri.