Venjari í inniróðri settur

Róðrarsamband Føroya skrivaði 31. juli undir avtalu við Magnus Debess Madsen um at verða venjari í inniróðri komadi vetur. Í fjør setti RSF Boga Olsen sum venjara, og eftirmetingin í vár staðfesti, at ein venjari er sera týdningarmikil at hava fyri menningina av føroyska inniróðrinum. Bogi valdi ikki at halda fram og søkir aðrar avbjóðingar.

Árið í føroyskum kappróðri er júst farið afturum, og er hetta byrjanin upp á vetrarpartin, har vit í Føroyum við støðugt vaksandi undirtøku íðka inniróður. Og ikki minst við sera góðum avrikum í kappingum uttanlands.

Magnus Debess Madsen og Hallgrím Hansen, næstformaður

Stutt um Magnus kann sigast, at hann er 34 ár og búsitandi í Vestmanna. Hann er kendur bæði frá føroyskum kappróðri og inniróðri. Hann hevur m.a. róð við Argjabátinum, Kvívíkingi og Sundabátinum, og undir lestri í Danmark róði hann eisini í føroysku kappingunum har.
Afturat innirógvingini, sum er tengd at vanligari fyrireiking til føroyska kappróðurin, róði Magnus nógv í Danmark, tá hann flutti niður í 2008. Har vandi hann í DSR (Dansk studenters roklub) saman við fleiri av fremstu rógvarunum í Danmark, og luttók í nógvum kappingum. Hetta gav Magnusi sera nógv – bæði kropsliga og tekniskt.

Avtalan við Magnus gongur frá 1. august til 1. mars. Uppgávan er í stuttum, at venjarin er tøkur hjá teimum, sum tørva ráð ella aðra sparring í samband við venjing, vitjar róðrarfeløg, og saman við RSF taka rógvarar út til kappingarnar, sum verða uttanlands.

Fyri framman eru 4 kappingar í Føroyum í hesum árinum:

– 22. september í Vági
– 20. oktober í Sandavági
– 17. november á Glyvrum
– 8. desember á Argjum

og helst 2 uttanlands. Meir um kappingarnar uttanlands, tilmelding, kravtíðir v.m. kemur seinni.